社交遊戲開發商Zynga係facebook嘅合作夥伴，兩家人嘅命運真係衰到「一擔擔」，業績差兼股價低沉，Zynga喺年幾前，高薪禮聘John Schappert過檔做營運總監，佢已經決定同Zynga講拜拜，連董事個位都放棄埋。
Zynga次季業績虧損，仲警告未來六個月銷售將大幅下滑，嚇到投資者腳仔軟。
John由Electronic Arts過檔Zynga，曾經帶來無限憧憬，行內人士形容John喺行內罕有，係既可以做好遊戲開發，又可以管理公司嘅高層，直情同獨角獸一樣罕有咁話。在位期間都開發咗唔少受歡迎嘅facebook遊戲，好似FarmVile、CityVile、Mafia Wars等等，功勞可謂不少。Zynga行政總裁Mark Pincus就話，佢嘅離任對公司係一個重大嘅損失。
不過今次辭職都唔算突然，傳聞話佢要為公司業績增長放緩負責；另外Zynga嘅架構重組明顯係架空John嘅權力，原本係John下屬嘅流動業務主管David Ko同遊戲業務執行副總裁Steve Chiang，改組後將會接手負責遊戲開發，並且直接向行政總裁報告。加上公司改變營運方針，決定全力發展多平台遊戲，要玩家無論用屋企部電腦或者智能手機，都可以玩到Zynga嘅遊戲。你哋話喇，John Schappert仲邊有位企？仲唔快啲辭職走人咩！