「蕭條」呢個經濟用語，字典一定有得解，凱德商用（06813）行政總裁林明志（圖），就用咗實例嚟解釋。
話說佢哋係香港、新加坡雙邊上市嘅公司，早前派成績表，一視同仁咁喺兩地見吓傳媒，第一場喺新加坡搞，林總話根本冇記者到場，吓，點解咁唔畀面呀？林總話係經濟蕭條嘅例證，因為當地經濟唔係咁好，記者要減薪，每周工作天亦都減為三至四日。當時業績會後只係得一個攝影師嚟錄影，攝影師二話不說就遞張紙畀林總，上面寫住幾條問題，叫林總先照住張紙讀問題，然後就對住攝錄機回答問題。
新加坡傳媒緊縮人手到呢個地步，林總話，呢啲咪係蕭條囉。好彩佢哋第二場喺香港搞嘅記者會，都有唔少傳媒到。
林總又用出街食飯嚟做指標，佢話九八同○三年都嚟過香港，當時因為有金融風暴同沙士，喺香港出街食飯唔使排隊。反觀依家喺內地，去親凱德嘅商場食飯都大排長龍o架！中港星邊度先至叫做蕭條，大家心中有數啦！