喺劇烈嘅市場競爭下，企業嘅品牌形象日趨重要，品牌價值早已係公司最主要嘅無形資產，內地新公布嘅《2012胡潤品牌榜》，中國移動（00941）就重新砌低工行（01398），成為中國最有價值嘅品牌。
作為全世界最大嘅移動網絡商，中移嘅品牌喺內地早已深入民心，而中移嘅「最有價值品牌」地位，其實亦只係喺去年先首次畀工行超越。而按胡潤今次嘅估計，中移今次係以2,760億元（人民幣‧下同）嘅品牌估值，重新超越品牌估值為2,530億元嘅工行，成功重奪一哥位置，至於品牌價值排第三嘅建行（00939），品牌估值就係1,820億元。
其實睇番胡潤呢個品牌榜，排首100名嘅企業中，銀行同金融業就佔咗24家，通訊營運商除咗排第一嘅中移外，亦有排第13嘅中國電信（00728）同第15嘅聯通（00762）。相對嚟講，以網站在內嘅訊息服務業，今年就有21個品牌上榜，係入榜品牌企業增長最多嘅行業之一。當中排全國第四嘅百度同第七嘅騰訊（00700），仲同時成為排行最高嘅兩個民營企業品牌，足以顯示互聯網行業嘅高速發展。