絲絲尋日中午畀個賓卡姊妹急call，問我知唔知道有間新國際時裝店開幕，叫我即刻過去話有嘢睇，絲絲見有時間就諗住去湊吓熱鬧啦，點知見到有超過兩打男模，全部只着短褲企喺度任影任合照，仲要個個高大靚仔六舊腹肌，仲正過啲奧運男運動員呀，搞到閱男無數嘅絲絲都有啲企唔穩。
絲絲唔想幫間嘢宣傳，不過呢啲盛況喺中環真係好少見，好多OL行過都忍唔住回頭，跟手忍唔住尷尷尬尬拎部手機出嚟偷影，再忍唔住走埋上去合照添。絲絲個賓卡姊妹帶埋成班同事睇到眼都唔眨，仲指住好多瘋狂嘅鬼妹，話佢哋都係賓卡嚟，返工就斯斯文文，依家就好鬼open。
有人鬧間嘢賣肉宣傳，不過絲絲覺得，近排個市咁悶，畀中環靚女一族輕鬆吓都係好事，而且美男唔係靚女至啱，絲絲見到在場好多西裝骨骨嘅中西男士，部分流露嘅陶醉眼神更甚於女士們添！