孖妹S檔案：你對股票有幾認識？

鍾：中央證券董事總經理 鍾絳虹

彩兒：股票款式多樣，設計過程係點o架？

放大圖片

放大圖片

鍾：在公司上市時，我哋會幫公司設計股票樣式，而公司就可以就公司logo （標誌）及股票顏色畀意見，但由於要跟番上市規則嘅規定，又要就番電腦的印刷格式，所以我哋喺設計上的變化好少！其實，據經驗，大部分公司對股票款式都唔會有太大意見o架，惟普拉達（01913）例外，因為佢哋本身係意大利公司，相當重視設計及款式，特別要求只以logo為背景，另亦會提供埋pantone色碼作為股票的底色選擇。

放大圖片

放大圖片

高妹：仲以為可以喺滙控（00005）股票上畫隻獅子添！

鍾：梗係唔得啦！一來印刷成本貴，二來已經有水印印咗上去，仲邊有位印獅子！

印刷過程異常講究

彩兒：印刷成本有啲咩考慮因素o架？

鍾：一般股票上顏色愈多，成本就愈高，所以我們通常唔會用超過三個顏色，盡量幫公司做cost-control（成本控制），如果公司想加多一兩隻色都OK，都唔使加好多錢嘅。

高妹：股票係點印出來呀？

鍾：大致可分兩個程序。首先，當公司確認股票設計後，我們便會安排特許印刷商進行bulk print（大量印刷）。為着防偽措施，我哋會選用已加入水印、馬毛等防偽特徵的證書紙張，而現在本港共有三間獲證券登記公司總會授權的證券印刷商可進行印刷工序。

之後，當完成公眾認購及國際配售後，我哋會喺新股上市前把股東資料印在股票上。由於只有過戶處擁有新股東資料如名字、地址、股數等，呢個程序我哋自己負責印！

彩兒：市場上多唔多人持有實物股票呀？

鍾：在以我們公司為過戶處的上市公司中，若以市場價值計，實物股份約佔所有股份40%。

大冧市刺激提取實物

高妹：邊啲股民較鍾意持有實股o架？

鍾：通常都會係年紀大啲，且鍾情長線投資的股民會提取實股，因為佢哋較少喺市場上做買賣，所以會選擇持有實股。因此，年前大冧市嘅時候，唔少股民做咗蟹民後，就會索性提倉攞實股，目的可以慳番存倉費，日後收股息亦可免除手續費，我記得當時仲要特登加印股票去應付提倉潮o架，但近年的市況波動，恒指不斷咁升升跌跌，所以依家少咗人提倉！

彩兒：如果張股票唔見咗，或者股票遭損毀，股票價值會唔會受影響o架？

鍾：唔會，因為股東資料已經紀錄喺股東名冊上，所以投資者唔見咗股票都唔使擔心，只需要去番相關的股票過戶處報失就得喇。至於損毀咗嘅股票，就要視乎損毀情況而定喇，若然股東資料仍在，便可獲重印股票，但如果股東資料已遭損毀的話，就要依循報失程序去處理。不過，投資者唔好心急去扔掉已損毀的股票，可先諮詢股票過戶處，以避免不必要的報失程序呀！

股票真身收藏家「晒冷」

謝：富時指數亞洲區副董事 謝汝康

高妹：你擁有逾七十張實物股票，你點儲藏o架？

謝：我會把一些股票放喺屋企，另外我亦租咗個迷你倉放置部分股票，但若是面額較大的股票，我就會放喺保險箱喇！

鑑別顏色水印簽名

彩兒：你啲股票儲咗十幾年，有冇試過出現發霉的情況？

謝：咁又冇喎！由於我以前儲開郵票，咁我咪好似集郵咁會用膠套去保護股票，所以依家仲未出現發霉境況，但畢竟已擺放了十多年，都會出現紙張變黃的情形呀！

高妹：你對邊張股票款式的印象較深刻？

謝：由於大多股票都係以公司logo作背景，再附加水印，所以都唔會特別有驚喜，但依家的股票款式設計無疑會較以往創新，用多咗唔同背景顏色，唔似以前只以白色及黃色為底色。不過，我會特別留意上市公司主席的簽名，可發現唔少公司已經換咗主席喇！

彩兒：你咁多股票，搬屋咪好多程序囉？

謝：咁耐以來，我只搬過屋一次，但幸好我持有的股票全是以中央登記及卓佳兩大公司為過戶處，所以要更改地址都相當方便。雖然股票上印有住址資料，但並不需要重新發放o架，因股東名冊已有齊我的全部資料，即使股票上的住址不對，亦唔影響我的股東權益，最重要係過戶處要寄到股息、年報等資料畀我！

中央證券小檔案

中央證券喺七二年由怡和及滙豐合資成立，兩者各佔五成股份，當年主要處理旗下股東作股票過戶登記及領取股票等事宜呀！後來被澳洲公司Computershare分別於九九年及○一年從怡和及滙控購入中央證券股份，由Computershare全權擁有中央證券。不過，由於港人對「中央證券」的名字認識較深，所以維持原有中文名稱，只是把英文名稱由Central Registration Hong Kong Limited轉做Computershare咋！而中央證券乃上市公司與股東之間的溝通橋樑，主要工作範疇包括召開股東會、寄年報、派股息等事宜。

資料來源：證券上市規則附錄二Ｂ部

（高妹）（彩兒）

若有料報畀高妹同彩兒或有嘢問，可電郵money.biz@opg.com.hk