平時同人玩啤牌show hand就見得多，將價值210億美元，即係大約1,638億港元嘅金磚show hand你又見過未？絲絲講緊嘅係，美國紐約聯邦儲備銀行最近為自己呢個全球最大嘅金庫進行核數，點算金磚數量同檢驗質量，向公眾show hand。
不過呢次核數工程繁複，紐約聯儲銀行做咩無嘢搵嘢嚟做呢？眾所周知，美國印咁多銀紙，全靠背後有大把黃金做儲備。但係從來都無咩人見過佢哋嘅真面目，美國有幾多黃金儲備，只能從官方公布嘅數字得知，所以就有人懷疑到底金磚係咪真係存在。絲絲記得由布斯韋利斯主演嘅電影《Die Hard》系列，其中一齣嘅故事咪係講偷呢個金庫嘅金磚囉！
為咗釋除公眾疑慮，紐約聯儲銀行就靜靜雞做咗個核數，由美國審計總署監督，結果將會喺年尾公布。原來紐約聯儲銀行嘅地下金庫係第一次進行核數，呢個金庫總共貯藏咗五十三萬條金磚，約值210億美元（約1,638億港元），佔全球官方黃金儲備兩成三，而當中三萬四千幾條金磚係屬於紐約聯儲銀行金庫嘅，剩低嘅金磚係屬於其他三十幾個國家同組織，例如IMF嘅。核數期間，金磚首先會上電子磅磅重，跟住就會移去另一張枱做質檢。聽講會有超過350條金磚會抽出嚟做質檢，淨係呢啲sample都已經值十一萬美元喇！