絲絲講場：中海油買Nexen美作梗抽水
中海油（00883）當年收購美國油企優尼科被美國外資審查委員會（外審委）刁難，交易最終胎死腹中，估唔到今次收購加拿大油企Nexen（尼克森）亦節外生枝，一班美國議員要求外審委以國家安全為由反對交易，除非中國承諾畀美國公司參與內地市場嘅對等機會，否則今次單deal免問。
國會議員逼開放市場
今次帶頭反對中海油嘅參議院係民主黨第三號人物舒默，佢以往抨擊中國外貿同人民幣政策而揚名，佢話交易畀美國政府一個籌碼，可以迫使中國就範，佢仲請求財政部長蓋特納以外審委主席身份反對，務求要拆散鴛鴦。
可能係大選年，美國議員做秀未停過，佢地亦要求蓋特納調查中興通訊（00763）。有議員指中興通訊賣監視系統同被禁嘅美國電腦設備畀伊朗，違反咗美國對伊朗嘅制裁規定。同一時間有咁多嘢要查，絲絲睇班議員都唔使放暑假。