Market Insight:銀基未到買貨時

若係巴塞球迷,對加泰隆尼亞應該唔會陌生,這個屬於西班牙較富裕自治區,消息話居然無力償還借貸利息,需要向西班牙央行尋求援助,隔晚西債抽上7.59厘的歐元誕生後新高,消息話一旦歐洲央行唔盡快恢復買西班牙國債,該國政府不排除要求全面救助,避免財務崩潰。

西班牙今日十足十碌爆卡,勉強還住「min pay」(每月最低還款)嘅大種債仔,今年經濟增長近零,未來兩年樂觀估都係得1至1.5%,舊債到期,債養債成本一旦企穩7厘樓上,條街數如同雪球一樣愈滾愈大。今次同四、五月希債危機最大分別係,萬一西班牙開口要求歐洲央行援助的話,5,000億歐元規模的歐洲穩定機制(ESM),隨時被西班牙一國掏光,一旦火燒連環船波及意大利,真係唔知點收科。

去年美國財長走訪歐盟,希望以過來人經驗,同歐盟傾吓金融危機救災心得,可惜最後食閉門羹相當無癮。

最近美國財政部專責國際金融事務的助理部長科林斯,又啟程到希臘及意大利商議應對歐債危機,看來年底尋求連任的奧巴馬,都開始緊張歐盟救災救到一鑊粥,最終連累到做得一任總統。

「沽神」漸變「燈神」

日前,「沽神」普爾遜主持季度投資檢討會,預測歐元區最終有50%瓦解風險,喺名嘴中都算睇得最淡一人。不過,沽神○七年賭次按爆煲威到盡之後,之後幾乎賭乜輸乜,重倉美國銀行股賭復甦,結果歐債危機金融股大插插,第一季睇好黃金,又遇資金避險潮買美金沽黃金,今次檢討主要是向客仔們致歉,旗艦基金Advantage Plus上半年又輸16%止唔到血,信定唔信,悉隨尊便。

睇咁淡,一為神功二為弟子,今年四月沽神估德國會被其他歐豬兄弟拖累,大手沽空德債,殊不知希、西、意債輪住散,熱錢反而湧去德債,十年期德債息由四月初1.8厘,碌落1.16厘創歷史新低,息跌意味價升,沽神又揩,好自然出口術為睇錯市護航,亦冀望班愈輸愈甘的大客,畀多些少耐性咪「抽資」。常言道,賭錢要搵運氣較自己差的對手,俗稱搵「燈」,股市一樣啱使,沽神出口猶如暗黑危機中的一線曙光。

大行唱好又如何

港股昨日半日市,恒指跌150點報18,903點,滙豐中國七月份製造業指數彈返到接近50盛衰分界水平,見49.5的五個月高位,可惜股市焦點去了歐洲,幫助唔大。港股半日成交292億元唔算少,即月期指更旺丁旺財,6.4萬張易手,比上星期個別全日市仲要多,港交所(00388)是否要返去諗諗,延長交易時段刺激交投,可能是一個笑話!

太保(02601)批股後大屠殺,昨反彈0.6%見24.35元,距離基金接貨價25.5元超過一蚊,一如昨日所指,基金透過沽空其他幾隻跌得少的內險股對沖,國壽(02628)、平保(02318)及財險(02328)統統見紅,不過沽空比已回到正常,相信未來兩日被基金糟質力度會紓緩。

中海油(00883)61%溢價買Nexen,唔少分析員為交易護航,認為長線有利,瑞銀及大摩分別建議買入及增持。不過,追逐短利是股市金科玉律,低PE股借錢買高PE資產,淡友點會輕易放過,中海油昨跌4%收報14.82元。

新收購效用成疑

銀基集團(00886)向廣州藥業(00874)收購潘高壽食品飲料五成權益,收購項目主要包括「潘高壽」品牌涼茶、龜苓膏、枇杷飲料及潤喉糖產品,年初至今股價跌近五成一的銀基,受消息刺激微升1%見3.11元,但五糧液代理賣枇杷膏同涼茶,令人有風馬牛不相及之感。

消息唔多的銀基,年初被彤叔睇中,由6.6元買到落3.2元,鍾意追大戶手影的真係喊得一句句。過去一年,民企浪接浪爆出管治危機,芬佬聞風喪膽,加埋內地白酒消費開始受經濟淡風影響,但咁奀的保健品項目,對比銀基近37億元市值,幫助有幾大,見仁見智,看來見到股價確認轉勢前,古勝覺得大大聲細細注玩吓無妨,但上月份成績表,銀基去年全年營業額升34%,應收帳卻大升2.07倍達14.4億元,話可以放心去買都係呃你。

古勝

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!