○六年九月喺美國紐交所上市嘅內地教育網絡企業新東方，上市編號係EDU，近日慘成美國研究機構渾水公司（Muddy Waters）狙擊新對象，更旋即被沽空，兩個交易日市值已經縮水一半以上。新東方不甘捱打，董事長俞敏洪開腔反擊報告斷章取義，但渾水亦大爆畀中國國家安全部阻撓調查工作，雙方展開隔空罵戰。
渾水創辦人Carson Block爆料話，渾水調查新東方嘅過程中，有一名員工畀國安部人員搵上門，暗示叫渾水唔好繼續對公司、特別係上市公司展開調查。咁咪同早前有報道指，國安部嚴打私人調查公司，隱瞞內地企業不利嘅財政消息，又唔畀查企業數據，有啲不謀而合？
新東方董事長俞敏洪周四接受《21世紀經濟報道》訪問時，一律否認財務造假、未有披露加盟訊息等等指控之餘，仲「金句王」上身，話渾水對新東方嘅報道寫到好似小說一樣，更將公司「身上長咗一粒粉刺，實際上可能係一粒美人痣，就講到係癌症」，狠批渾水處心積慮整垮公司嚟獲利。俞氏仲話，如果有投資者因為佢嘅原因而損失，佢會有自殺嘅念頭，不過事實係投資者嘅損失全因渾水嘅報告。呢場口水戰誰勝誰負就未知，但絲絲會一路食住花生，一路幫大家緊貼最新劇情。
余詩韻