絲絲講場:求證股神比亞迪未失寵

呢期比亞迪(01211)嘅傳聞可謂沒完沒了,啱啱至否認完平治房車放棄合作嘅傳聞,又傳出因為電池問題畀股神巴菲特減持。股神「拋棄」呢個傳聞,唔搞清楚後果絕對唔講得笑,比亞迪管理層尋日就拿拿臨出嚟否認,仲重申話同股神嗰邊有直接聯繫過,證實並無咁嘅事。

負面消息浪接浪

否認都未夠,佢哋仲引述公司內部嘅人話,對公司業務好有信心,仲透露話喺太陽能領域嘅投資損失,已經喺上半年完成提撥,成功撇除呢個包袱之後,相信下半年張成績表有明顯嘅好轉添!透露咁多嘢,證明佢哋非常緊張股神嘅一舉一動。

比亞迪都算黑仔,好多負面消息,好似發盈警話上半年嘅純利會跌百分之七十五至百分之九十五、電動車被撞起火、傳平治放棄合作等等,雖然兩間公司齊齊發聲明否認有啲咁嘅事,比亞迪事後仲話唔排除對啲不實報道採取法律行動。不過,相隔幾日又再傳話因為電池出現問題而畀股神減持H股,公司高級副總裁兼董事會秘書吳經勝即刻出嚟拆彈,話同股神嗰邊聯繫過,對方否認有任何減持行動。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!