外國人都鍾意足療
呢間叫華夏良子嘅公司，招股係咪受歡迎，當然要睇好多因素啦！不過，絲絲發現，原來有好多外國人都鍾意幫襯腳底按摩o架。
佢哋諗住去法蘭克福上市，作為喺歐洲拓展業務嘅第一步。雖然佢哋公司喺時機、規模同估值方面都仲未有定案，但就話有可能最快今年會成行。依家個個市場都畀歐債危機搞到立立亂，似乎冇影響到華夏良子喺德國上市嘅計劃，睇嚟佢哋都幾心急，莫非外國人對於足療嘅需求真係咁大？以後絲絲去歐洲旅行玩到攰嘅時候，都可去幫襯下腳底按摩喇。
唔講唔知，九七年成立至今，佢哋已喺中國同歐洲開咗超過三百間分店，佢喺歐洲嘅足迹遍布德國、英國同芬蘭三個國家。當中又以德國嘅業務最蓬勃。