Market Insight：新地有條件追落後

持續多日的低成交，無論基金經理或者散戶，都抱住「等陣至郁」的心態，以為聯儲局主席伯南克發表中期貨幣政策報告前，股市會水盡鵝飛，不過升市唔等人，昨日早市期指出現十五分鐘挾高300點的奇景，淡友居然死於平日鮮有炒家留意的澳洲儲備銀行（RBA）的政策會議文件內容，確係死唔眼閉，亦反映後市有躍躍欲升的情況。

昨日早上九點半，RBA公布七月政策會議紀錄文件，顯示經歷五、六月兩次減息，累計四分三厘之後，委員認為暫時沒進一步減息需要，同市場估計繼續減有所出入。

放大圖片

放大圖片

曲線話畀大家聽，中國對鐵礦石及煤炭需求無想像中疲弱，澳洲及中國經濟比市場預期樂觀，加埋人民銀行再次逆回購，短期減息的憧憬升溫，經過連環放水，近期人民幣息口回落幅度唔細，一個月拆息由高位4.8厘回落至尋日3.12厘，見一個月低位，淡友受到教訓，大市挾高後橫行，收市升334點報19,455點，走勢派常用的移動平均線，一日內連破10日、20日及50日線三大阻力，唔等伯南克開金口預告放水，好友經已得勢不饒人。

華廈滬深有可取處

一月內兩次減息，內地資金供應近日有迹象由緊轉鬆，剛跌至半年新低的A股，古勝深信已開始有留意必要。過去散戶直接投資A股嘅門路唔多，揀來揀去都係安碩A50（02823）、標智滬深（02827）之流。

不過昨日開始多個選擇，首隻A股ETF登場，老友分析話隻華廈滬深三百（83188），兩大好處相當啱「斤斤計較」的股民，一是管理費暫時是眾多指數基金之中最低，其次所持有股票由ETF信託基金管理，唔似雷曼迷債咁有counterparty風險。

券商與壽險股也是曲線之選，近半年營運數據一直跑輸同業的國壽（02628），六月份保費收入314億元人仔，按年升8.3%，與五月比較更大升49.5%，比較基數低之外，新產品危疾保險好賣，過去幾個月營運數據真係麻麻，五月開始國壽累積沽空唔少，昨日股價升至21.65元，剛好疊住五月初及七月初兩次反彈高位21.65元及21.75元，一旦突破淡友勢必投降，不妨留意。

全球央行輪流放水，前晚美國十年債息創超過兩世紀以來新低，連facebook創辦人朱克伯格，都將加州間豪宅攞去按，30年浮息做到1.05厘，消息上埋財經頻道。

超低息率縱容借貸

古勝多次提過，超低息形同縱容借貸，懲罰儲蓄，資產價格受到刺激下，對有錢人身家的提升作用，肯定大過一窮二白的普羅打工仔。一葉知秋，你睇坐擁200億美金身家的朱生都玩按樓套現，唔通等錢使咩！

香港資產價格處於回歸後高位，但本地地產股卻遠遠落後於樓價，近日，特首房屋政策陸續曝光，毫無疑問，股市對樓市被推倒經已過慮，古勝深信地產股在未來半年至一年內，跑贏大市機會相當大。新地（00016）多名高層正式被起訴，這類全港頂尖律師食大餐的訴訟，戰線一拖兩三年唔出奇，高層出事後，新地比長實（00001）跑輸11%，比恒地（00012）跑輸17%，一有地產股追落後，二有壞消息出盡，新地有條件收復失地，繼續是古勝中短期最看好股票之一。

建築股不愁冇生意

呢輪港股載浮載沉，成交萎縮，加埋咁多盈警股，令魚缸滿佈魚雷，企業要配股集資並唔容易。難得昨日聽到有批盪活動，所講嘅係中國建築（03311），據聞擬以先舊後新股方式配股集資約15億元。

內地大興土木興建保障房同各項大型基建，加埋未來數年香港將加快興建公屋及復建居屋，類似中國建築呢類大型建築商唔愁冇生意做，淡市仍能成功集資，必有其因。

近月其股價持續逆市走強，前日見52周高位，如今看來係炒高後抽水，短線股價有調整亦唔出奇，但只要守穩上升通道底部7.5元水平，大有條件保持強於大市嘅表現。

古勝