任職港交所（00388）主席整整六年嘅夏佳理，陪伴香港見證金融海嘯嘅威力，依家佢已經退落嚟，仲喺佢哋嘅官方刊物「爆料」，當初點解請李小加（Charles）做CEO。
一切要從面試說起。招聘委員會接見咗好幾位候選人，當時有人問Charles點解想做呢份工？佢話：「我想有些特別嘅作為。」呢個答案同招聘委員會大部分人嘅想法相信都好接近。當然，仲有佢無懈可擊、令人讚嘆嘅履歷喇。唯一可挑剔嘅，係擔心佢唔識廣東話。但諗深一層，廣東話同普通話純粹係同一語言嘅兩種方言，因此認為呢方面應該不致構成障礙。
夏佳理嘅任內，當然有好多大事發生，好似友邦保險（01299）首次公開招股，至今仍然係單一交易所嘅最大宗首次公開招股。之不過，對佢嚟講呢宗IPO既喜且悲，因為佢一位摯友Paul Calello，喺AIA上市後沒多久就病逝，至今佢兩公婆同Paul嘅家人仍保持密切聯絡。Paul喺將AIA售予英國保誠嘅計劃當中出咗好多力，只係最終並無成事。