黑莓（Blackberry）近年畀iPhone同三星手機打殘，黑莓嘅生產商RIM，銷售同盈利都大跌，為咗自救，RIM正計劃出售集團一架商務客機，實行慳得一蚊得一蚊。
RIM嘅CEO海因斯（Thorsten Heins）話，黑莓喺智能手機市場唔夠對手搶，以美國市場為例，舊年銷售額就大跌47%。喺呢個艱難時期，集團惟有節省開支提高效率，今個財政年度目標，係要省下10億美元。賣客機只係第一步，預計可以套現約600萬至700萬美元，同時省下每年約210萬美元嘅飛行開支。接住落嚟仲會裁減大約5,000員工，佔現時集團人數達三分之一，同埋關閉多個製造工場。
睇番RIM嘅股價，由零八年高位逾140美元，下跌至尋日收市價約7美元，跌幅超過九成，都咪話唔驚人。銷售額下跌，市佔率不斷被蠶食，盈利能力被質疑，都係股價暴瀉嘅原因。集團上個月又宣布新產品BB10智能電話延至出年面世，睇怕短期股價都難有起色。
今次出售嘅客機由達梭航太製造，型號F50EX，可容納九位乘客。集團保留嘅另一隻客機同樣由達梭航太製造，型號F900EX，機身更大可容納十二位乘客。