「大鱷」索羅斯行走江湖咁多年，喺投資市場上面，食咗唔少大茶飯，點知最後都畀佢個仔「出賣」！大家唔使驚，做慣慈善活動嘅亞歷山大‧索羅斯，只不過係將陪老竇做gym時段賣畀人，搵多啲善款。
呢條橋都幾有諗頭架，同「大鱷」零距離接觸，一齊做運動，真係諗都未諗過。最終中標者以2,500美元（約1.95萬港幣）得到索老做開健身嘅嗰間健身室會藉，享受同索老做gym嘅樂趣！
亞歷山大以「想睇佢爸爸着短褲」為題做宣傳，真係創意十足。聽講嗰日啲出席者見到索老坐係台下面，個樣好似全不知情咁，仲唔係畀阿仔「出賣」！其實搞呢場拍賣嘅組織係亞歷山大揸fit嘅，而索老仲亦係組織嘅最大捐款人添，亞歷山大咁樣擺佢爸爸上枱，你話係咪不肖啊？
拍賣所得善款將捐畀維護人權組織Global Witness，而當日除咗拍賣「睇索羅斯着短褲」之外，其他嘅拍賣品都好吸引㗎！包括有同「末日博士」魯比尼共進午餐同埋去後台拜訪小萬人迷歌手Justin Bieber，絲絲聽到有競投者話見到咁嘅場面都覺難取捨，計我話，做慈善嘅嘢做得幾多就得幾多喇，根本唔使揀！
股神巴菲特搞咗好多年嘅慈善午宴拍賣，不妨搞多幾款搵多啲善款，好似同股神唱歌、踢波、放狗、行山……
余詩韻