MARKET INSIGHT：丁財兩縮 忍手為上　

實情今年buy side、sell side都好，唔少對股市，以至年底份花紅早就無懸念，有老友更提早放暑假同家人共享天倫，好難怪個市成交愈玩愈縮，昨日得422億元比上周五少67億元。

看官或許會問，刻下股市既不旺丁，更不旺財日子仲要捱幾耐？年初至今恒指變動唔大，得5.4%升幅，可是單計藍籌股最叻嗰隻新世界（00017）升54%，最曳的聯通（00762）可以急跌38%，表現之兩極化，可以見到炒股唔炒市已經成為大趨勢。君可見，近期內地煤跌通脹跌，市場捧內地電力股表現唔差，一直推介睇番高息股，恒生房地產信託基金指數（HSREIT），昨日仲創埋○八年以來新高，可見有主題故事配合，一樣可以發光發熱，股民亦唔需要太過悲觀。

放大圖片

放大圖片

A股見底睇住PPI？

內地通脹跌到二十九個月低位，六月份CPI得2.2%，比大行估計2.3%更低，難怪上周四人民銀行可以早人一步，先行減息救經濟。但係見人行減存備率、逆回購兼減息都救唔到股市，古勝反而對生產物價指數（PPI）更有興趣，六月份數字按年率計跌到負2.1%，創兩年半新低之外，亦比五月負1.4%擴大，內地製造業出廠價格持續下滑，可見製造以及出口業毛利率薄過刀片（甚至見紅），對於以第二產業主導的中國經濟實在不利。

事實上，反映製造業出廠價的PPI，過往同A股走勢好似倒模一樣，上一浪PPI由○八年七月10.1%，到○九年七月低位負8.2%，回落時間剛好一年，A股周期早些少開始，由○七年十月6,124點，撻到落○八年十月1,664點見底，同樣跌足一年，只係A股比PPI行先大約三季時間。

伊泰成新進「基金股」

今趟中國PPI在一一年七月在7.5%見頂，至今回落周期過咗十一個月，但睇落九成九機會，唔會再見中央4萬億人仔救市，所以下個月PPI調整周期是否結束，古勝無水晶球唔敢亂估！睇番A股指數一○年十一月在3,186點見頂開始陰陰落，調整已超過一年時間。綜觀人行放水不遺餘力，加上古勝對歷史周期的迷信，亦因為咁，對A股或者中資股未來一季唔想睇得太淡。

本來雨潤食品（01068）及雙匯（000895）等巨企出現，以往主觀認為內地豬肉及加工市場，長遠可實現規範化，達到更高標準的食品安全。直到近年幾間肉企瘦肉精等醜聞不絕，加埋近期中國女排輸波，懶無安全豬肉可食，聽落好笑，但正正反映，這個行業未有耐可以達到外國的安全水平。雨潤創辦人日前宣布跳船，祝義材辭掉主席及執行董事等職位，加上「路邊社」傳政府補貼豬場金額大減，看來八月中期成績表，解釋種種謎團之前，股價剛創三年半新低的雨潤，神仙難救。

在下八到，找來大唐發電（00991）、寶鋼及Lion Fund等七個基礎投資者入股的內蒙伊泰煤炭（03948），最後都要以下限43元定價。由於市況唔就，一向買新股當抽獎的散戶興趣大減，公開發售部分最後獲配比例，佔新股1.62億0.7%，換句話得百零萬股落入散戶手中，伊泰真係名副其實「基金股」，上市係龍係蛇，周四掛牌自有分曉。

體育用品股續尋底

呢期魚缸乾塘，強勢股轉弱，弱勢股更弱。好似體育用品股分屬龍頭企業嘅李寧（02331）作出高層人士變動，以應對行業困境，但未能挽回投資者信心，股價反彈乏力。

昨日更傳來旗下西班牙子公司破產，係真係假仍然要有待公司證實，但體育用品行業生意難撈，卻已經成為鐵一般嘅事實！就連李寧都話希望用六至十二個月才可以消化庫存，其他二、三線品牌情況就更加嚴峻，股價繼續尋底在所難免，抱住可以睇少一瓣股份嘅心態看待應該唔會有錯！

古勝