奧運會即將喺倫敦開幕，孖妹都想參與呢個四年一度的盛事，可恨今年市況不濟，我哋未能從股市上贏到赴英機票。不過，原來本港金融界亦潛藏咗唔少運動健兒，個個都身懷絕技，所以我哋今次一於喺香港搞番個金融界運動會，搵嚟各界金融精英，響應呢個全球盛事！
彩兒：你經常參加世界各地的馬拉松比賽，實有好多難忘經歷啦！
林：要數難忘經歷，非撒哈拉沙漠的馬拉松賽事莫屬！呢個賽事要跑足七日，總共跑243公里。我記得我喺第二日肚瀉，仲嚴重到屙血，嗰時我都好擔心自己會命喪黃泉o架。不過，好彩我瞓番一晚之後好番好多，之後嗰幾日仲愈跑愈順，最後更可以完晒成個比賽！
彩兒：Sugoi（好厲害），你點堅持到最後o架？你有啲咩心得可以分享一下？
林：其實跑馬拉松時，體力固然重要，但亦要有策略去配合跟隨，如跑手應在何時發力及留力，皆可影響表現及賽果，情況正如股民點set（設定）投資策略，皆着重情緒的控制。儘管途中遇到不少突發情況，仍要堅守計劃，免受他人左右，因此大部分成功的跑手或者投資者的EQ（情緒智商）均比較高呀！
彩兒：唉，今年的投資道路好崎嶇，我哋「跑」得好辛苦呀！
林：你哋要喺「起跑」之前就訂好投資策略！現在市況屬熊市階段，即有兩次跌市，當中會夾有一個小升市。自上年十月跌至16,170點之後，恒指會反彈約50%，就喺今年二月的高位21,760點，所以首個跌市及小升市均已過去，依家正處於第二個跌市階段呀！
我估計下半年歐債問題有機會再度惡化，恒指將會跌至17,000至18,000點水平，但屆時將是入市時機，股民大可趁機分段買入內房股及內需股，因中央將會放寬貨幣政策，可抵銷歐債的不利因素，並刺激後市展開升浪。因此，投資者需在年前擬定各個離場或入市時機，就如同跑了一年的馬拉松！
彩兒：聽你咁講，睇嚟「跌市終點」終於在望啦！
馬拉松運動年資：18年
運動員簡介：曾參加多項長距離比賽如毅行者、北京馬拉松、行路上廣州，更完成被喻為全球最艱苦的撒哈拉沙漠馬拉松。
高妹：奧運即將開幕喇喎，你係咪最留意劍擊賽事呀？
陸：今年港隊首次全陣出賽，六個個人項目皆獲得參賽資格，可謂歷史時刻，所以我已經買咗門票去倫敦支持港隊啦！
高妹：我知道你玩開花劍，講求鬥快進攻，一擊即中，你的理財之道又會否如出一轍？
陸：哈哈，劍品的確可以反映性格，雖然花劍着重主動進攻，但我本身係較為謹慎之人，所以我會攻守兼備。其實劍擊好注重情緒控制，如何於落後時仍能冷靜分析形勢，選手應要避免作出不必要的動作呀！就以今年市況為例，個市日升日跌，唔少投資者都出現虧損，應趁此反省自己的策略部署，唔好再做太多不必要的買賣呀！
高妹：唉，輸錢皆因贏錢起，就係因為之前贏錢而變得心雄囉！
陸：係呀，好多人食髓知味，但股民要懂得設止賺位才可，亦要因時制宜，所以我經常提醒自己保持頭腦冷靜，先可以分析到大市趨勢呀！.
劍擊運動年資：18年
運動員簡介：曾代表香港參加亞青賽、世界大學生運動會、世界錦標賽，最佳成績為全港男子花劍排名第一，現是香港劍擊總會裁判委員會成員。
彩兒：我好鍾意睇林丹打羽毛球o架，今次奧運我實支持佢！
張：我都會支持中國隊，始終係自己國家嘛！不過我最欣賞的是丹麥選手Peter Gade，他最擅長假動作，堪稱無人能敵！
彩兒：運動員的風格與打法均因人而異，你又是一個怎樣的羽毛球選手呀？
張：不論是運動或是投資，皆會受到個人性格所影響呢。我並不屬於力量型，但我打羽毛球時都會較為進取，所以我選擇借力打力，而投資亦然o架！我會借貨投資，因為我覺得財富係可以藉由槓桿效應去累積出來。不過，既然運用到借貨，風險自然會較高，所以我會小心篩選投資項目，務求在進取之中尋求穩健呀！
彩兒：羽毛球與窩輪有咩相似之處呀？
張：兩樣嘢都好講求靈活性，羽毛球甚為考驗我哋的反應，好似能否立刻轉身等，都係比賽的成敗關鍵。至於窩輪市場，亦非常着重投資者的靈活部署，方能獲利呀！此外，心理質素亦相當重要。打波又好，炒輪又好，大多時候就係參與者的心態唔夠放開，先會容易畀人牽着鼻子走，如果能夠放鬆些少的話，成效反會更加理想！
彩兒：股市立立亂，窩輪市場又如何呀？
張：大市既缺乏方向，亦冇增長動力，以致窩輪市場的交投淡靜。現時的投資者多以短炒為主，投資比重亦多放在即日鮮的買賣，可謂適者生存，因此投資者需因應自己的取態去選取唔同的策略，如穩陣人士可以選取一些時間值較低亦較為貼價的窩輪，至於對前景較有信心的投資者，則可揀選較高槓桿的窩輪啦！正如我哋打比賽時，若有信心擊敗對手，便不會再停留在磋波階段，應立即展開急攻獲分呢！
羽毛球運動年資：19年
運動員簡介：曾參與亞洲青少年羽毛球錦標賽，亦曾獲得多屆的全港學界精英羽毛球比賽冠軍。
高妹：你主打「得分後衞」這個位置，係唔係着重進攻多啲呀？
何：無疑我哋要依靠進攻攞分，但籃球的節奏很快，若對方能在轉眼間同樣得分，亦是於事無補，因此籃球比賽的致勝關鍵是防守！
高妹：怪不得籃球場內，觀眾所喊叫的打氣口號總是「防守！防守！」
何：唔止喺籃球場上o架，投資場上亦要講求防守呀！姑勿論你有幾多資金，若果不懂得防守止蝕的話，就好容易輸番畀個市場，尤其是期貨市場的節奏也相當明快，有唔少人仲玩到輸身家添，所以真係要嚴守止蝕呀！
高妹：今年的期貨市場，你又睇好甚麼商品？
何：其實香港個期貨市場的發展潛力不俗，港交所(00388)亦頻頻推出政策與國際市場接軌，期貨總類也愈來愈多，如現在已有人民幣結算的貨幣期貨，而當中我續睇好黃金呀，因為全球經濟轉差，資金便紛紛湧至黃金市場作避險之用，所以金價能夠企穩喺每安士1,600美元水平。
籃球運動年資：12年
運動員簡介︰曾活躍於大學籃球界，代表城市大學校隊參加比賽，更曾獲選為香港籃球聯賽甲二組代表。
高妹、彩兒
若有料報畀高妹同彩兒或有嘢問，可電郵money.biz@opg.com.hk