Market Insight：越秀房託 暫宜觀望

今年人行兩次減息，今次開始不對稱減息，貸款較存款息率多減6個基點，加上貸款基準利率下限，由0.8倍降至0.7倍，意味內地銀行，將有更大自主權，向客戶提供更佳貸款優惠，一如溫總所指內銀暴利結束，還富於民的時代來臨。

不妨睇番年初至今，恒指累積升幅7.4%，四隻藍籌內銀全部跑輸，中行（03988）升0.7%，建行（00939）跌5%，交行（03328）跌5.9%，工行（01398）跌7.6%，幾間國有銀行業績尚在歷史高位，股市已率先在估值上打折扣，也因為幾隻權重內銀股拖住後腿，恒指整體啤打拉低，每次反彈動力相對減弱，認識幾位期指炒家，也大嘆今日難玩過以前。

放大圖片

放大圖片

鋼鐵股不妨低吸

雖然中國一面減息，一面強調內房調控不放鬆，但無阻內房股升勢，上周五中國海外（00688）、保利（00119）及恒大（03333）股價均逆市報升。古勝相信，雖然預期房產限購令唔會取消，銀行亦唔會放鬆房貸業務，但兩次減息有助刺激用家入市，加快消化市場庫存，而利息成本下降，亦有助房企減輕財政負擔，故說到底減息依然有利內房板塊。

觀乎○九年中央開始打擊樓市炒風，已初見成效，為防樓市硬着陸，政策逐漸由緊轉鬆，估計下半年內房股依然具獨領風騷條件，此外，下半年房企有望加快啟動新項目嘅速度，故除咗可以繼續留意內房股之外，亦可關注周邊產業，例如係估值低迷嘅鋼鐵股。龍頭股鞍鋼（00347）最近發出盈警，話唔埋本周初鋼鐵股又會震一震，上周古勝提及嘅馬鋼（00323），可以認真留意低吸機會。

相對於內房股，本地地產股上半年表現參差，新世界（00017）大升57.8%，但新地（00016）卻跌1.9%，輸九條街，唔少人期望新特區政府推低樓價協助無殼族上車，不過有時係要講天時地利，低息期似乎看不到盡頭，公共房屋供應增加十畫未有一撇，無論政治或者經濟方面考慮，推冧樓市條件欠奉，與樓價嚴重背馳的地產股，相信下半年極有機會，來一次大幅修正。

芬佬怕輸又要買

港匯輾轉從五月7.77升至7.753，逼近強方兌換保證，恒指亦由萬八點回到接近兩萬關口，各國央行放水推波助瀾，基金經理風險胃納回升，路人皆見。有趣的是，傳統risk on期間無運行的公用股及REITs，今浪居然升埋一份，上周五領匯（00823）、置富（00778）以及陽光房產（00435）齊創五十二周新高，可見芬佬一方面對股市步步為營，怕輸又要買，反而對低息期「有排玩」信心不斷增強，一直向high yield股身上加注。

至愛的領匯往績息率已跌穿4厘，係本地唯一資產有溢價的REIT，持貨者大可放心，但新資金入市短期值博率猶如雞肋。最近，越秀地產（00123）向越秀房託（00405）注入價值過百億的廣州IFC，這蛇吞象的交易，寄給股東的通函成本電話簿咁厚，唔知有幾多股東有耐性睇完？

精心部署惹疑竇

由注入資產折讓，到避免越房股東派息即時被攤薄，越秀使出了不少財技，為酒店及服務住宅初期營運補貼；大股東收取遞延股份，變相放棄部分股息；未來批股設定最低3.56元下限；為免套戥活動影響批股，仲有特別股息等等，處處可見交易的精心部署。

正所謂小人之心度君子之腹，股市追求短利乃人之常情，項目長遠（可能是三至五年後）潛力再好，千算萬算只令短期派息不減，未知下月特別股東會能否安撫一眾好息之徒？每次有控股公司向子公司注資，筆者也特別多懷疑，尤其交易動機。

簡單講，複雜補貼說明IFC未成熟是事實，假如直說越秀要減磅的話，等輕身上路應付其他投資，筆者或許更加接受，但以此均衡越房目前簡單的組合風險（估計注資後佔兩年收入約五成以上），實在有點說不過去，特別股東會過關之後會有巨型批股，基金要買貨應不急於一時，恐怕在七月表決前，升幅未必及得上其他幾隻REITs。

古勝