一個人一時激動或酒後失言爆粗都可以諒解，鬼叫香港人生活艱苦咩。但係因為一時激動，搞到要出口「槍斃造謠者」，咁Prof. J就覺得過分咗啲。Prof. J講緊嘅咪係恒大地產（03333）主席許生囉。
一般大家對許生印象都係斯文人，最衰咪有一間叫Citron嘅外資機構，話佢公司水分高，透過表外交易將負債降低。最勁抽係人哋真係有備而來，用咗幾個月時間預備份報告，有成57頁咁長，為咗照顧香港股民老友記，連中文都預備埋，加上近見市場信心極弱，有事就梗係「恐慌式拋售」，難怪股價急跌，連飯都唔食去見分析員，佢老人家一時激動，實在係情有可原嘅。
恒大見勢頭唔對，出通告還擊，無奈地以危機管理學來講，針對有餘，新料欠奉。加上老許大聲叫大家信佢，你知啦，信一個人容易，用一個人嘅誠信掛鈎於一間上市公司嘅命運，風險又幾何式增加。
雖然恒大核數師係Big 4之一，但佢哋嘅新料數據都係搵佢再check一次，意義不大。睇醫生知自己有病都會搵另外一個confirm多次，呢種常識，可能係許生一時激動忘記咗啫。
許生另外為人津津樂道，就係同城中富豪嘅友情歲月。Prof. J就覺得喺嗰種圈子，生意真係由關係建立出來，鬼叫Prof. J係「中產中嘅中產，只有揸鑊鏟囉」。股價暫時喘定，會唔會又為下一次嘅股變作準備呢，繼續追蹤，出發。
香港大學電子金融服務榮譽助理教授 徐燦傑