香港好多高官就快落場，冇晒壓力，就可以暢所欲言，喺大陸其實一樣，好似前國資委主任李榮融，就將國企嘅衰嘢，賴晒政府管理不善。
作為昔日嘅「國資總管」，李榮融提到國有企業遇到嘅普遍難題。佢認為，國企沒搞好，責任喺政府，而唔喺企業。政府管得多，又唔符合規律，唔承擔責任，「一個沒有責任嘅領導去幹事，能幹出好事來？不可能！」佢仲話「管理的最高水準是少管、不管，而不是愈管愈多。」其實呢個現象，喺香港都有，好多官都一係交唔出成績，一係就乜都唔管。
李榮融自從退休之後，已很少露面，只喺一啲大學演講中露兩手。佢話，希望退休後能幫助民營企業，為民營企業嘅成長作一點貢獻，佢呢個意願，好大可能係以前成日管國企，退休要「避開吓」，反而想幫民企。佢講咗個小秘密畀絲絲聽，原來佢好佩服台灣嘅王永慶，因為私有企業要真正搞成一個大企業，很不容易。