即刻抽獎知結果
工銀亞洲旗下依家有106部ATM，分別喺中環、將軍澳、天水圍商場同各屋邨，無論工銀亞洲定其他銀行嘅客，用佢哋部機撳錢，拎港元又好人民幣又好，交易完答埋一條體育常識題先，就有得即刻抽獎同知道結果，唔使再等公布，到時揸住張通知書就可以去領獎。
絲絲聽講呢個遊戲玩到八月尾，有老友記話成班朋友睇睇吓比賽，玩包剪揼輸咗嗰個落街買零食時，撳錢有得過吓癮都幾好，不過聽講係撳錢次數愈多贏獎機會愈大，怕唔怕有人分幾轉撳錢，次次只撳100蚊，咪搞到ATM大塞車？定呢個係宣傳手法之一？睇嚟呢個暑假唔止睇奧運，仲可以順便睇埋工銀亞洲啲ATM有無人龍。