由一班工商界專業人士，因返北京修讀國家行政學院國情班而成立嘅同學會，話咁快又到咗一周年紀念。周年活動搞手之一嘅同學會副主席李細燕透露，已訂咗下個月13同14號舉行慶祝儀式。絲絲奇怪點解慶祝要一連兩日呢？原來佢哋諗住衝出香港，將紀念活動移師到深圳舉行，所以要「住一晚」！
話明係國情班同學會，一眾成員當然都係好學人士，因此搞手特登安排咗內地一位著名嘅財經教授嚟到深圳，向同學會成員講課，希望可以增進各人嘅金融知識，最重要仲可以藉此加深對內地金融方面嘅了解。
當然長途跋涉去到深圳，除咗聽書外，同學會一周年慶祝活動梗要有啲餘慶節目輕鬆吓，最受大家歡迎嘅、又可以有多人一齊參與嘅，梗係搞卡拉OK比賽喇。
絲絲唔知道其他工商界專業人士嘅歌喉係如何，但絲絲就聽過金融服務界嘅卡拉OK，個個都唱到「歌王」咁款，所以同學會慶祝當日肯定係絕無冷場。
唔講唔知，國家行政學院屬省部級培訓機構，喺研究中央政策嘅基地，唔少高官喺學院培訓，工商界亦有先見之明，08年開始亦返去學習。不經不覺，都搞咗幾屆，共有百多名會員。