雷士照明（02222）嘅大股東吳長江，上月辭咗董事長一職，依家市場仲有好多揣測，佢日前解釋，話辭職係因為身心疲累搞到血壓高，去新加坡睇病，血壓高到嚇親醫生，話到咗人嘅極限，吳太呢排要睇住佢食藥至放心。
有傳話佢喺內地畀人調查，股東會又唔見現身，一時間好似失咗蹤咁。吳長江近日終於「蒲頭」，原來身在香港，仲接受內地傳媒《第一財經日報》訪問，話遲啲要去加拿大。吓！唔通真係有風頭要避？其實佢只係陪妻女過加拿大讀書居住，仲話要返內地嘅話，隨時都可以返。但為咩要減持雷士照明股份？佢話係之前玩孖展，畀經紀斬倉還咗成八千幾萬。
佢今個月十日嚟咗香港，就係為咗搞掂孖展單嘢。咁傳聞話佢捲入重慶案件畀人調查，吳長江就話，佢之前喺重慶請咗個顧問，但呢位顧問捲入案件，佢只係協助調查，仲話自己冇問題唔怕人查，去完加拿大就會返嚟。
咁幾時返番雷士照明先？吳長江就大耍太極，話支持現任首席執行官張開鵬，又話想做雷士照明嘅第一大股東。
咦！吳生依家已經係大股東嘞喎，咁究竟佢有咩大計呢，就只好拭目以待嘞！
余詩韻