MARKET INSIGHT：市況沉悶等運到
英國同意大利兩大足球強國，因為怕輸選擇將最終結局交畀命運女神去決定，唔係每個股民都係球迷，但卻從「歐債盃」中得到啟發，大家實行唔做唔錯等運到，昨日恒指再跌97點報18,897點，港股主板成交縮至374億元，樂觀的投資者還期待周四歐洲峰會，會有奇迹出現，只怕痴心錯付，沉悶缺乏方向市況仲會糾纏一段日子。
內地股市走勢令人憂慮，人民銀行三年多以來首次減息的刺激，經已煙消雲散，昨日滬綜指跌至近半年低位，成分股中以資源股最弱，平均跌幅3.5%，工業及出口需求減少，煤炭價格一星內期罕有急挫近3%，成為被沽售的導火線。
「直通車」效應成疑
值得留意，昨日滬綜指收市報2,224點，跌穿三月底低位2,242點的雙頂頸線支持，滬綜指一二年平均市盈率跌至9.7倍，與歷史低位十分接近，可惜樓價死灰復燃依然是中央政府一大憂慮，年內人行減息、減存備金率的空間未必太多，大行估計只有一次四分一厘減息，0.5至1%的存備率減幅，外圍不穩，拖累內地經濟持續放緩，抵銷了財政政策逐步由緊轉鬆的好處。或者今日A股十分接近中期的低位，但跌穿2,242點重要關口之後，下一個可見的支持區，會在年初低位2,132至2,200點之間。
今個星期香港踏入回歸十五年，候任特首僭建疑雲及國家主席胡錦濤到訪將成為全城焦點。港人對現政府施政怨氣不絕，由以往紀錄，魚缸中人都猜測領導人來港前，好有機會先透過送禮平息民怨，營造良好氣氛。
就算今日以最瘋狂的想法，即使聞樓梯響多時的港股直通車突然放行，以目前內地股市極為悲情的淡況，估值還要比港股便宜的客觀因素，相信○七年誤以為開車，5,000億元襲港炒高恒指見三萬二點的盛世，歷史重演的可能性微乎其微。
倫敦豪宅依舊火熱
昨日所見，趁回歸前送禮概念炒高的券商、零售及珠寶股，上星期搶高後買盤開始無以為繼，以現時內地情況，只怕捧場客希望愈大，到時失望愈大。
新世界發展（00017）主席鄭家純，透過私人公司斥資4.5億英鎊（54.7億港元），進軍倫敦地產市場，入股位於倫敦東面，泰晤士河旁的Greenwich Peninsula項目六成權益，該沿河長達1.4公里的巨型項目，包括住宅、商用及酒店樓面，毗鄰英國O2體育館，附近也是港人較熟悉的金絲雀碼頭，即倫敦新金融區。
歐洲經濟麻麻，加上唔少歐洲貴族及超級富豪，怕歐元最終難逃解體命運，熱錢湧入信心較高的英鎊停泊，最受惠要數西倫敦傳統豪宅地段，以及部分近年落成新盤，往往畀熱錢秒殺。古勝認識幾位老友太太，都話近大半年，倫敦西區尤其豪宅林立的Kensington附近，靚盤幾乎連睇樓機會都無，熱鬧程度，比香港豪宅有過之而無不及。
純官今次重錘出擊Greenwich Peninsula，熟知英國樓市的，會認為風險唔細，以香港為例，情況如同富豪熱炒山頂屋，純官卻狂掃西九龍一樣。不過，有番咁上下年資嘅股民應有印象，新世界系非上市投資，往往表現遠勝上市公司，君可見彤叔的周大福（01929）上市前後表現，可知一二。
憧憬利好政策出台
又接近半年結時間，唔少投行開始對下半年股市走勢作預測，其中中金就估計，第三季內地政策會持續放鬆，A、H股有15%反彈空間，但要提防第四季歐債危機又再發作。
古勝亦相信，六月以來北大人再推數以百億元計嘅消費補貼措施兼作出減息決定，效益將於第三季逐步浮現，只要歐債危機暫時平靜下來，大戶有做好嘅理由。眼見呢期大淡市電力股發圍，持貨者可考慮逢高沽出，將資金分注轉投股價低殘嘅優質周期性股份，如內險、內房及消費股。
古勝