近排大家見到中銀人壽執行總裁蔡中虎（CF）時，傾得最多嘅除咗佢啲人民幣保單外，當然係佢會唔會參選嚟緊呢屆嘅立法會。
事關有傳佢本來有意參選，但畀「阿爺」勸退，以免太多中銀系人馬參選，尋日絲絲就向CF求證係咪被勸退，佢直接了當咁話：「聽都未聽過！」
咁唔通CF已經決定參選？CF話仲有幾個因素要考慮，因為四年前佢以些微票數輸咗畀現任立法會議員陳健波，如果兩人再參選嘅話，CF要諗吓有乜因素說服選民轉投畀佢；而且呢幾年立法會嘅文化都有幾大變化，要考慮自己適唔適應到，假如入到去可以有乜貢獻。
至於中銀嘅立場，CF話集團一向好支持員工出任公職回饋社會，若果佢決定參選就會通知集團，睇吓集團放唔放人。
其實今年保險界嘅選情可能會好激烈，因為絲絲聽聞除咗CF同陳健波外，仲有兩人都有興趣參選，有意者可謂覆蓋壽險界同一般保險界，睇嚟到時又會有一番龍爭虎鬥嘞！