中資證券業協會近期真係「好紅」，喜事「打孖上」，繼美國「過江龍」紐約泛歐交易所都要加入協會成為佢哋首個特別會員後，該會由改組成立到依家，眨吓眼又到咗五個年頭，中資證券業協會梗要藉此機會搞大佢，慶祝一下。絲絲聽聞，中資證券業協會已擇咗吉日，喺下個月26號喺會展舉行盛大嘅慶祝典禮。
中資證券業協會嘅前身係中國企業協會旗下嘅證券行業委員會。07年5月證券行業委員會正式改組成立。首屆會長係中銀國際副執行總裁謝湧海，現任會長就係國泰君安執行總裁閻峰。
絲絲以前曾參加過中資證券業協會嘅酒會，絕對係「不惜工本」，除咗場地布置勁豪、畀面出席嘅嘉賓勁多外，連在場嘅工作人員都穿着整齊劃一嘅制服，真係一絲不苟。
事實上，中資證券業協會近年影響力不斷擴大，齋睇紐約泛歐交易所都要加入成為首個外國會員便可略知一二，中環人士分析，紐約泛歐交易所無非都係想借助中資證券業協會嘅平台同人脈，希望可以拉攏更多內地企業到紐約上市。
咁又係，中資證券業協會依家有超過五十三個會員，分別從事證券、期貨、基金等業務，基本上內地出名嘅金融機構都係佢哋會員，想發展內地生意，都好難唔「埋佢哋堆」啦！