俗稱「股評人協會」嘅香港專業財經分析及評論家協會（IFAPC），尋日舉行會員周年大會，並且選出新一屆會長，原本由元老林家亨大戰少壯派鄧聲興，絲絲本以為有一番惡鬥，點知過程峰迴路轉，由鄧聲興「自動當選」新一屆會長！
原來尋晚選舉時，由會長藺常念叫出新會長候選人時，恒豐證券董事林家亨放棄出戰，結果AMTD總經理鄧聲興（Kenny）無對手下自動當選，耀才證券市務總監郭思治就當選副會長，藺常念因做咗八年會長有功，而被推為永遠榮譽會長，同林家亨一樣。
林家亨話佢本身係該會創辦人之一，會繼續以永遠榮譽會長身份監察個會。而Kenny就已經定咗政綱，除咗要提高個會嘅認受性同知名度，亦會進行內部改革，更重視公司管治，將權力下放，同成立獨立嘅監察委員會。
Kenny亦同意各會長只可連任一次，希望將協會嘅會員人數由目前約40人增至80人，下屆做到一人一票選會長。
不過絲絲仲向Kenny提出建議，就係將個會嘅名索性改做股評人協會，因為個原名真係又長又難記，佢話會慎重考慮喎。
余詩韻