絲絲講場:「鼠戰中環」為善鬥智能

絲絲嘅會計師朋友尋日急call,話要組班,原來佢哋要挑戰自己,再玩一年一度嘅鼠戰中環。喺中環返工嘅人都知道,呢個唔係捉老鼠清潔香港活動,係一個既考驗中環人體力,又可做善事嘅活動。

六年共籌逾1200萬

今年「鼠戰中環2012」已經係連續第七年舉行,過去六年,一班平日好正經嘅行政人員都會換上創意服飾,身水身汗咁喺中環跑嚟跑去,爭奪「鼠王」寶座。主辦單位係置地,佢哋嘅行政總裁彭耀祖話,平衡生活同工作係好緊要,所以今年嘅賽事都加咗唔少着重身心健康嘅挑戰。

參賽者想要最快衝線,仲要有心理準備,挑戰自己嘅體能同智力極限。因為除咗有考你體能嘅障礙,今年仲多咗一個要參加者完成拼圖嘅考驗,隨時考起唔少白領一族啊。比賽一共有八個賽段,第三賽段叫「轉數夠高,快人一步」,要求參賽者頭腦清晰,走畢太子大廈同歷山大廈嘅扶手電梯後,需要喺置地廣場中庭完成一副拼圖先可以同隊友交接。

比賽會喺十月十四日舉行,每隊最少要籌得五萬元,呢個比賽由○六年舉辦至今,已經籌得超過1,200萬善款。同過去六年一樣,所籌得嘅善款會全數撥捐「思健」,資助中港兩地推廣精神健康嘅機構同項目。唔想成日困喺辦公室,就快啲報名參加呢個咁有意義嘅活動啦。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!