自從彤叔（鄭裕彤）宣布交棒畀純官（鄭家純）之後，絲絲一直期待純官做番齣大龍鳳畀大家睇，為周大福同新世界（00017）系省吓招牌，而純官掌帥印後嘅新搞作，就係變身為「騎士龍」，踩入「水深火熱」中嘅倫敦房地產！
倫敦上市地產商Quintain公布，佢同澳洲地產商Lend Lease（LL）各佔一半股權嘅泰晤士河畔Greenwich Peninsula項目，獲純官入股，個項目係倫敦史上最大住宅項目，總值達30億英鎊，即約365億港紙。
純官嘅投資旗艦公司Knight Dragon，意譯就係好威風嘅「騎士龍」，將會買入LL嘅五成、再買埋Quintain嘅一成股份，成為呢個超級項目佔股六成嘅最大股東，但無透露作價，未來「騎士龍」會注入1.5億英鎊（約18.3億港元）現金，又提供3億英鎊（約37億港元）信貸。Quintain將毋須再注新資本，只負責管理，項目每年有約400萬英鎊收入。
地產朋友同絲絲講，倫敦由於奧運概念，過去幾年樓市走勢同香港一樣咁火，又被指出現泡沫，但呢個項目沿住泰晤士河長達1.4英里，佔地成1,400萬方呎，又確係獨一無二，業界話好難估將來係賺定蝕。
但純官過去嘅投資戰績大家有目共睹，所以絲絲都希望佢今鋪可以威番次勁嘅！
余詩韻