金銀業貿易場第四十三屆理監事會選舉尋日舉行，現屆理事長張德熙如事前所料連任，至於鄭裕彤嘅姪仔鄭錦標，同埋陳尚智就當選副理事長。
張德熙同絲絲都好熟落，佢由九二年開始擔任理事，○四年獲選為理事長。近排佢頻頻出嚟，皆因港交所（00388）向外shopping，買咗LME，呢單嘢同金銀業貿易場都有關係，佢話好支持呢宗交易，佢哋就快推出現貨白銀合約，足以彌補亞洲時區嘅實物交割需求，同LME有協同效應。
至於新任副理事長鄭錦標，係周大福珠寶金行董事，又係上市公司周大福珠寶集團（01929）嘅非執董，有超過三十年財務及行政管理經驗，佢仲係彤叔嘅姪仔添。
另一位副理事長陳尚智，係平和國際集團董事。佢自○四年擔任監事，○六年獲選為副理事長至今。監事長就由蕭坤鑾出任，佢係惠昶金號司理人，自九四年起擔任監事長。