每個地方嘅股市總會有幾個知名嘅維權投資者，例如美國富豪Carl Icahn、香港嘅David Webb等，而台灣就有曾經對鴻海董事長郭台銘當頭棒喝嘅阿土伯（李金土）。
阿土伯尋日就現身鴻海股東會，不過佢尋日不單止無批評鴻海管理層，更盛讚郭台銘「三好一公道」嘅企業老闆，仲提「臨時動議」叮囑郭台銘要顧好身體，為股東同台灣齊打拚。阿土伯喺台灣股市好紅架，好似台灣最近熱議嘅證所稅，阿土伯就曾多次公開為小投資者發聲。
郭台銘過往同女星頻傳負面新聞，阿土伯亦曾當頭棒喝「提醒」郭台銘要專注搞好業務發展。尋日就一反常態，話嚟股東會「是要來鼓勵不是要股利」，仲大讚郭台銘是「身體好、腦力好、衝力好又對員工公道」嘅「三好一公道」嘅企業家。
鴻海之前公布嘅業績表現麻麻，郭台銘尋日當然被股東追問業績前景，佢向股東拍心口強調就算面臨具挑戰嘅外圍環境，鴻海絕對不會蝕錢，仲更強調鴻海在技術上已實現「三大軟體、八螢一雲」嘅戰略，指出鴻海已實現跨越iOS、Android及Windows8軟件平台，產品包括手機、平板、電腦、電視以至戶外顯示板等八大螢幕，與及掌握雲端技術嘅發展策略，明顯要證明鴻海並不是只倚賴單一公司發展。
余詩韻