近日最大嘅新聞，要數內地銀行資本新規推遲至明年一月一日實施！由於中國入咗世貿，佢就《巴塞爾資本協定III》實施嘅時間同方案都會與國際差不多一致，而且條約已較早前嘅版本有所放鬆，呢個消息絕對有利宏觀經濟面，特別係銀行股，只爭在唔知幾時會反映出來！大家知啦，一如Prof. J話頭，價值係需要時間去發酵嘅，成功只屬於有耐性嘅人！
咁多間內銀入面，比較有資金壓力嘅要數光大銀行，其他內銀可藉住內部信貸評級、寬限期、非核心資本充足率、資產組合調整等等，成功過關。
最穩陣嘅莫過於農行（01288）及中行（03988），資金壓力會比較細。至於小型銀行，好似中信銀行（00998）、浦發銀行等，由於業務比較唔集中，或者冇咁易過關。
日跌夜跌，呢幾個月嘅慘況大家都有目共睹，老實講內銀板塊目前已幾便宜，尤其要數中信銀行、Big 4嘅農行、工行（01398）同中行等。「新規」最終目的都係想確保內地銀行有充足資本，令佢哋可以達致合理嘅信貸增長同埋鼓勵中小企仲有消費貸款。呢幾個消息加埋，雖然唔係話國家大鑼大鼓咁放行，但政策面已經傾向正面。
呢個誘因，有助於中期宏觀經濟增長。只要守一守，相信內銀股好快會東山再起。繼續追蹤、出發！
香港大學電子金融服務榮譽助理教授 徐燦傑