打工仔好期望嘅強積金半自由行即將出台，各方要做嘅準備工作都七七八八，但就唔代表積金局好得閒。話說前幾日積金局煞有介事咁，召集晒班積金供應商嘅高層開會，大家以為有乜重要嘢會宣布，點知原來係積金局要一統業界——一部「計算機」。
「計算機」同我哋屋企嗰部梗係唔同喇，作用就好似買樓咁，通常都會去啲地產代理公司網頁，key啲重要數目入去，好似樓價、年期、息率等等，就會幫你計吓每個月供幾多，積金商依家嗰部計算機都係咁上下，會喺網頁度提供一個計算機小工具，等供款人知道供款若干年後大致可得嘅回報。
不過積金局依家想業界統一嘅計算機，就複雜好多。老友話，積金局今次真係有啲阿茂整餅，要輸入14個假設資料作計算，試問普通人又點識用呢？所以老友話開會嗰日，有唔少行家反對。
老友話，其實部計算機背後嘅數學原理大家都一樣，轉用第二個理論上分別不大，唔明點解積金局要花心機整過另一個，直接畀條算式積金商咪搞掂。而且市民應該知道個計算只係粗略預測，唔能夠百分百當真，積金局部計算機實在太精密喇。
金占士