微博威力不可小覷，名人往往成為被關注嘅對象，粉絲數目分分鐘係天文數字，以「巨人」品牌起家嘅史玉柱，喺IT網絡界享負盛名，自然有唔少粉絲啦。早前佢喺自己微博度講，如果突破六百萬個粉絲，就會捐六百萬元人仔做善事，每增加一百萬個粉絲，就會累積計咁捐錢，條數都咪話唔襟計呀！有網友仲幫佢計過，如果粉絲超過1.5億人，史玉柱就破產喇！
有「史大膽」之稱嘅史玉柱，稱得上係創業達人，佢曾經破過產，但冇放棄，最終踏上青雲路，名成利就之後，有數以百萬計嘅追隨者。聽聞佢呢個捐錢方法，係喺某日玩微博時忽發奇想諗到嘅，若果以《福布斯》今年嘅數據為準，史玉柱個人資產有113億人仔，計計吓，即係如果有超過1.5億個粉絲，佢就要捐晒成副身家。
絲絲尋日睇，佢嘅粉絲已超過603.45萬人，比前日多咗兩萬幾人，計一計唔使兩個月，就可達700萬個粉絲，雖然同1.5億仲有大段距離，但係正常嚟講，邊有人做慈善做到破產o架，勢估唔到，「史大膽」真係未驚過，佢仲話：「破就破吧，至少沒上次破得難看，破了就回來第三次創業！」嘩！真夠吉士，絲絲忍唔住要加入粉絲之列！