柳傳志自正式退出聯想（00992）董事局，專注母公司聯想控股董事長職務後，更為積極推動中國嘅創業文化，佢喺大眾心目中嘅形象，亦都由過往嘅「IT教父」，搖身一變成為真正嘅「元老級」創業先鋒。
佢尋日喺內地網站分享創業經驗，就話佢同蘋果公司創辦人喬布斯最大嘅分別，就係「喬布斯對蘋果公司嘅品牌作用大到無可被複製、但柳傳志在聯想嘅經驗卻是可以複製嘅」。
其實佢都唔使咁謙，作為全球第二大PC生產商，佢嘅領導能力有目共睹，中國管理研究國際學會，下個禮拜會頒發「傑出經理人獎」畀佢。
柳傳志唔鍾意人哋叫佢做「教父」，強調自己係紮實做普通事嘅人。柳傳志被網友問及喬布斯去世對蘋果公司嘅影響時，佢就指出，蘋果公司做咗一個示範，世界品牌係可以咁重要及值錢，喬布斯喺當中所起嘅作用，遠遠大過柳傳志對聯想品牌嘅作用，所以，喬布斯係唔可以被複製、而柳傳志就可以。
網民讚決斷似曹操
呢個說法，充分表現出佢對喬布斯地位嘅敬重之餘，亦體現佢自己多年來堅持嘅企管理念。
有網民就形容，柳傳志嘅決斷力及真性情，有如「三國」中嘅曹操。但另有網民反駁，話好唔似喎，因為曹操出名疑心重，又好色。
余詩韻