絲絲講場:東吳攞「第一牛」好意頭

尋日東吳水泥(00695)首日上市,除咗公司股價首日掛牌就撞正港股升市,重上萬九點關口,認真好意頭之外,絲絲日前已預告港交所(00388)用嚟送畀每間新股上市嘅紀念品水晶金箔牛亦昂然進入新一代,由一隻威風凜凜嘅銅牛代替。

新銅牛配上新股東吳水泥,絲絲相信港交所諸君都希望從此港股可以有一番新景象,但尋日大市成交仍然好少,得嗰465億咋,近排日日都係咁上吓,惟有寄望新股嚟港上市唔好停,起碼沖喜吓先!

掛牌遇升市股價靚

至於尋日港交所正式起用新一批經過本地雕塑家林可頤重新設計嘅銅牛,東吳水泥董事長兼執行董事謝鶯霞就似乎幾鐘意,佢仲話能夠有幸收到新一批之中第一隻銅牛特別有意義,象徵公司非常好意頭。咁又係呀,睇番尋日東吳股價表現,收報1.15元,比起招股價嘅1.1元升咗約4.55%,都叫做靚仔啦。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!