七大經紀團體尋日同候任特首CY（梁振英）飯局，今次係CY三月當選特首後首次同證券經紀食飯，個個經紀自不然把握機會，紛紛向佢表達訴求。
有份出席CY飯局嘅人士就同絲絲講，CY承諾新班子上場後，會多啲關注本土經紀行嘅生存空間，亦會多考慮中小經紀嘅意見，CY只係講咗大方向，具體細節就冇詳細交代。
至於CY競選時提出成立嘅金融發展局，據出席飯局人士話，將會「事在必行」，絕唔係「吹水」，仲引述CY話「七‧一」上任後就會立即起動籌備。
中小經紀普遍對CY話多照顧本土經紀利益，即刻「冧晒」，話好歡迎佢有呢個思維，事關佢哋覺得政府喺過去多年嘅金融發展政策都「傾斜」大經紀，中小經紀經營環境愈來愈窄。至於CY係咪真係做到，就要拭目以待。
依家中小經紀最關心梗係自己個「飯碗」保唔保得住，尤其係「零佣金」風氣日盛，加時又成交反縮，衍生工具充斥扭曲市場等，問題多多，真係諗到都頭痕！
尋日個飯局，係由聯交所歷屆理事聯誼會拉線，該會主席李業廣同埋副主席蔡陳葆心都有出席，再加埋七個會嘅主席同會長，同埋其他經紀，場面認真係好熱鬧。
余詩韻