絲絲講場：四叔點燈 賀煤氣
中華煤氣（00003）原來已經服務咗香港一個半世紀，尋日就搞咗個慶祝150周年嘅活動開幕禮，身為主席嘅四叔（李兆基）當然隆而重之，仲親自「點燈」，象徵住煤氣由19世紀開始，發展到依家嘅成長路程。而四叔兩位公子、兼煤氣非執董李家傑同李家誠亦有出席，全程就傍喺四叔身邊。
四叔尋日就「話當年」，以前未有煤氣嘅時候，有錢人都要靠點油燈，連煤氣燈都無，但到依家，煤氣已經成為每家每戶不可缺少嘅一部分。
花生騷顯服務多元
絲絲未見過煤氣燈，唔計喺中環嗰盞停用咗嘅煤氣街燈，對煤氣嘅認知，就係屋企個煤氣熱水爐同煮食爐，但經過尋日之後，就好似走咗一轉時光隧道。話說喺開幕禮就有場fashion show，模特兒着住唔同工種嘅制服，顯示公司多元化嘅服務，而特別嘅係，早喺六、七十年代，煤氣已經有客戶服務，真係犀利。
股東大會有食有拎
個展覽分咗幾part，擺咗唔同年代嘅產品，絲絲印象深刻嘅有煤氣熨斗，原來有部分嘅展品仲係真品，平添古典風味，亦都好似見證住香港歷史同經濟發展嘅變遷！展期由即日起至六月十日，喺IFC商場展出，仲有得喺懷舊布景前留倩影、大抽獎等等，有睇就趁早喇！
尋日都係煤氣周年股東大會嘅日子，除咗一般茶點之外，公司仲特別送咗本好有歷史價值嘅相冊、同埋壽包畀股東，真係普天同慶喇！
余詩韻