備受「造假數」醜聞困擾嘅上海醫藥（02607），尋日召開A股嘅股東大會，嚟自各地嘅投資者齊集會場，決心聲討管理層。成個會議七國咁亂，小股東嘈嚟嘈去、不斷搶咪，又炮轟管理層搞內鬥。早就預咗班嬲爆嘅股東實會鬧場，所以三個獨立董事索性全部缺席，以免畀人糟質。
上藥為咗杜絕記者蒙混入場，派晒實Q嚴密擋架。公司怕記者，就唔怕班小股東，就好似有小股東追問造數事件，唔通空穴來風？總裁徐國雄大大聲話「保留對涉及人士追究嘅法律權利」；有基金經理炮轟財務總監沈波，「唔使用腦，用腳趾都睇得出你哋造假數！」沈波淡定回應，係因為完成北京項目嘅購併帶來嘅商譽。
有個老股民走上主席台，仲情緒激動咁控訴「我由股票發行開始就揸住上藥嘅股票，我好痛心，到底管理層發生乜事？依家股價只係剩番十幾蚊，對唔住全國嘅股東！」
徐國雄話，公司冇所謂嘅「改革派」同「保守派」，更加冇水火不容嘅內鬥，唔係點做到A+H股上市，仲連續兩年營收錄得增長？
會議一共有17項議案，無論股東點樣對抗，舉晒牌反對投票，議案都係全部通過。候選董事長周傑仲以85%嘅贊成票通過，成為新掌門。宣讀完之後，有小股東冷笑話，「小股東乜用都冇」！