一年一度嘅科技會議D10啱啱開鑼，絲絲知道有唔少科技巨子都喺會上發表吓偉論o架喇，但發表到好似甲骨文舵手埃利森咁爆嘅就真係少有！
埃利森揚言甲骨文其實係可以媲美蘋果公司，話蘋果生產iPhone，係包括製造埋入面嘅軟件、硬件同埋提供相關網上服務，而甲骨文正喺數據中心方面效法蘋果。另外，佢仲形容蘋果「教主」喬布斯係史上最傑出思想家之一，就好似畢加索咁，可以將好多好嘅橋轉化成一件完整產品，簡直係藝術家、工程師同埋企業家喎。
埃利森仲爆料，話原來當日蘋果公司市值超越甲骨文時，喬布斯打電話嚟挑機，話佢雖然係覺得光榮，但並唔係推動佢更上一層樓嘅動力，只係表示人哋鍾意佢啲產品。
講起啱啱上市嘅facebook（fb），埃利森話雖然佢以前都曾經好沉迷上fb吹吓水，但就話fb雖然係全球矚目，而依家都有好多後起之秀嘅科企，上月起上市嘅數據公司Splunk就係其中一家。佢仲話，喬布斯當年被踢出自己創立嘅公司，其實畀咗個告誡畀朱克伯格，叫佢喺董事局掌握投票大權。