絲絲講場：富士康去到邊踩到邊
被外界貶稱為「血汗工廠」嘅台資富士康（02038）尋日開年度股東大會，雖然三年嚟富士康舉辦大會地點都「咁啱」唔同，但依然無損大批香港民間團體踩場嘅決心。不過，最終富士康都無派代表接信，所以呢班民間團體惟有自己搵代表扮郭台銘，「接受」一早預備咗寫住「血汗工廠、天下第一」嘅錦旗。
民間團體拉隊請願
除咗工會組織聞風而至之外，大學生監察無良企業行動（SACOM）等團體一眾二十幾人，早就企係大會門外，久候富士康管理層，據SACOM話，佢哋無非想富士康嘅控股公司鴻海集團，可以落實民主選舉工會，尤其係鴻海集團旗下另一子公司富士康科技，作為蘋果公司產品主要代工廠，由工資、工作環境同權益方面都需要嚴正得到改善。
富士康管理層冇理到踩場嘅團體，發言人童文欣話，母公司一直有同團體溝通。
自讚員工待遇唔差
佢又重申公司立場一貫清晰，希望提供健康及安全嘅工作環境畀員工。新任行政總裁程天縱話，喺員工待遇或人工方面，富士康可以話「前面數一數二」，仲話公司希望成為中國嘅「標杆」。有消息話富士康科技計劃明年下半年，將工資加一倍，去到4,000蚊人仔以上水平，公司就回應話，工資係考慮通脹、工資水平嚟定，唔同地區或有分別。
余絲韻