金融海嘯之後，全球好多人都對貪婪嘅金融機構咬牙切齒，慢慢引發出「佔領華爾街」運動。絲絲記得呢個浪潮更喺舊年十月席捲香港，叫做「佔領中環」，然後慢慢又演變成佔領滙豐總行地下廣場嘅活動，皆因絲絲過去半年行過中環，被佔領嘅好似都係滙豐總行地下。
不過，絲絲收到風，尋日滙豐發咗個內部通函畀員工，話為咗今年稍後時間攞番個場做社區活動，會開始要求佔領者自願離開，如果佢哋執嘢走時，仲會幫手添。其實滙豐以往都經常喺地下個廣場搞活動，自從佔領中環之後，連哈囉喂呢類大型慶典都無得玩，佢哋個通函都講番個地下其實係私人業權嚟o架，只係設計時用嚟做公眾通道，平時順便搞吓活動。
一場金融海嘯，滙豐總行變咗佔領者搭棚總部，但聽講呢半年都同樣吸引到一啲遊客參觀o架。
余詩韻