台灣打算開徵證券交易所得稅，結果搞到全台雞飛狗走，股市唔使歐債危機，都畀呢個證所稅玩死。負責推銷證所稅嘅前財長劉憶如為咗說服立法委員，上個禮拜就以鴻海集團董事長郭台銘做例子，話如果開徵證所稅，郭董一年就要畀多20倍稅喇。
嘩！咁多？當日鴻海即刻出新聞稿回應，話集團同郭台銘都依法交稅，官員講嘢要就事論事、理性、宏觀，唔好針對個人，用郭台銘做案例係「好唔恰當」。其實郭董把火仲未熄，佢嬲到差啲就想透過記者會嚟宣洩不滿。
郭董發火係因為前財長搵佢做例子，等於向外洩漏佢嘅個人資料，而且證所稅連點樣徵收都未知，又點計到佢要交多幾多稅呢？根本係誤導，亦唔公平。畀人叫得做「首富」，郭台銘一向自認係交稅大戶，但居然仲有一種計法唔使交稅？咁樣畀人誤解，簡直係傷害佢嘅名譽。
先幾日證所稅嘅版本至少有十個八個，除咗財長，立委自己都攞郭董嚟做樣辦，計下可以收到幾多稅。但所有假設都有盲點，連股票實際成本都唔知，又點會計得啱？真係唔怪得郭台銘扯火喇。
余詩韻