絲絲講場：葛霖返娘家 「獅友」拱照
三年前突然辭任滙控（00005）主席，轉任英國貿易及投資大臣嘅葛霖，尋日重臨香江，向商界人士推介英國嘅投資及貿易環境。葛霖喺滙控工作時，一眾同佢共事過嘅高層都畀面出席。
旋風式抵港演說
葛霖尋日朝早先喺深圳出席完官式活動，晏晝落嚟香港發表演說，夜晚就要飛返倫敦，都可算係風塵僕僕。佢喺致辭時話，今次係佢做咗官之後，第三次嚟香港，每次都覺得好似返娘家咁，好有親切感。
曾經同葛霖共事過嘅一班舊同事，好多今時今日都已經進身高層，尋日都畀面舊老闆，出席午餐會，當中包括今日會出席另一個午餐會、現任滙控行政總裁嘅歐智華，滙豐亞太區行政總裁王冬勝，滙豐香港區總裁馮婉眉，仲有已經退咗休嘅滙豐首位華人大班鄭海泉。
人幣業務啱倫敦
緬懷一番之後，葛霖少不免要講番正經嘢，sell番吓英國同倫敦嘅營商優勢。講到近期大熱嘅人民幣業務，佢話中國政府首先將香港發展成人民幣業務中心，係好自然嘅事；不過佢隨即話，相信除咗香港之外，倫敦亦係一個好理想嘅地點，發展成另一個人民幣業務中心。
近期歐洲飽受主權債務危機困擾，不過葛霖就話，歐元區係一個有成五億人口嘅市場，居民普遍都幾有錢吓，英國唔會放棄呢個市場。
佢估計喺未來一段日子，世界各地嘅政府都會透過大力投資基建，推動當地嘅經濟發展，而倫敦同其他金融中心，將可發揮融資平台嘅支援角色。
余詩韻