內地發改委話唔會再好似○八年咁用4萬億元人民幣救市，令港股昨日借勢回吐，收市跌365點。雖然睇走勢，恒指在18,600點水平好似有唔錯承接力，但跌市成交增加到553億元，令人覺得有啲不安。外圍方面，西班牙銀行嘅問題令該國信貸違約掉期（CDS）升到歐元區成立以來新高，真係一波未平一波又起，港股升唔起其實都係理所當然。
昨日一共有14隻牛熊證打靶，當中3隻係和黃（00013）牛證，有3隻牛證分別屬於中石油（00857）、聯通（00762）同中移（00941），其餘6隻為恒牛，兩隻為恒指熊證。其實以上數據，正係弱勢股嘅側影，當中聯通因為預料ARPU會繼續跌，昨仲創過52周新低。而目前牛仔街貨主要集結喺18,200至18,400點，涉及6.1億份街貨。
沽空方面，空軍昨日趁有壞消息再次重錘出擊，港股昨沽空金額達79.4億元，較前日大幅回升，而沽空比率更高達14.3%。
雖然近期嘅國際金融股受外圍影響而反覆向下，惟近年在亞洲新興市場發展不俗的友邦保險（01299）則相對強勢，該股將於周五收市後增加在恒指的比重，相關指數基金將需買貨。
瑞信最近發表報告，指友邦股價最近的回落，反映市場對大股東AIG減持的憂慮，但目前風險回報已變得吸引，故將其評級上調至跑贏大市，目標價31.5元。
友邦昨日雖然先升後回，但在逆市中仍能平收，走勢相對硬淨。若看好此股，可以考慮友邦荷合購（15703），行使價為26元，溢價則為6.4%，實際槓桿13.2倍，此輪雖然年期較短，但勝在人氣旺。
Handsome哥