Market Insight：重組收購好講時機

發改委否定「新四萬億」的預期，強調中央唔會再重複○八年大規模刺激經濟計劃，港股昨日跌365點，收報18,690點，幾近把三連升的升幅嘔凸。六月期指大低水380點，計埋除息影響都低水111點，期指客恍如世界末日一樣，要錢唔要貨。

真係奪命星期三，一星期前「大沽空日」，沽空佔大市成交14.6%創十三年新高，昨日14.3%乃年內第二高，395隻股票遭沽空。

放大圖片

放大圖片

睇月曆唔難理解淡友點解會齊齊膽生毛，歐洲央行會議在六月五日才舉行，仲有成個禮拜真空期，中國拒絕救市，憂慮歐元區因為希臘搞到解體收場的悲觀想法，像疫病一樣擴散，昨日西班牙十年國債孳息升到6.54厘半年新高，歐元插到1.2435見兩年新低。古勝見到個市都唔開胃，趁機走去睇紅酒展覽，見人頭湧湧好不熱鬧，一時間以為好多劉伶朋友同古勝一樣要借酒消愁？

歐債拖累紅酒指數

查實歐債危機爆發後，法國消費信心未好過，上個月跌落負33低位，追蹤全球最具代表性一百支波爾多佳釀的Liv-ex100指數，去年六月係364，而家係289，累積跌幅20.6%，加埋歐元兌美元由一年前1.45至今累又跌咗14.2%，換句話靚酒價計埋匯水，一年插咗三成二，嗒落唔單止有橡木桶味，仲有些少燶燶哋嘅複雜味道。

今明兩日，大摩MSCI指數及恒指服務公司旗下三個指數，分別有成分股比重輪替，指數基金需要追貨的包括新華保險（01336）、中國太平（00966）、澳博控股（00880）、友邦（01299）及金沙中國（01928）。

越房交易阿媽着數

有趣係指數變動公布至今，四隻被剔出指數或者比重下降嘅股份，包括人和（01387）、中國鐵建（01186）、中國動向（03818）及方興地產（00817）則有升有跌，反映離開指數唔代表一切，追住指數變動搵食的炒家，眼明手快到無朋友。

越秀系重組，越秀地產（00123）向越秀房產（00405）注入廣州國際金融中心項目，連債項涉及134.4億元（人民幣‧下同），由賣與買雙方股價一升一跌，可見表面有削肉還母之嫌的交易，市場第一個觀感係母公司着數啲啲。

表面上，收購作價有一成三折讓，而越房本身得五個項目，收購有助豐富投資組合，不過37.8億港元市值蛇吞象買廣州IFC，美銀美林估計大約令越房淨現值（NPV）攤薄約6%，估計廣州IFC一八年貢獻大約有5.9厘回報，由越房現價等於去年派緊7.46厘息，亦難怪基金齊齊用腳投票，先沽而後快。

同日另一宗蛇吞象交易，重慶鋼鐵（01053）以68.06億元作價向母公司收購長壽新區鋼鐵生產相關資產，當中5.38億元以現金，餘額以每股3.14元發行不超過19.96億股A股支付，意味着，交易九成二代價透過印公仔紙擺平。

賭死貓彈唔揀重鋼

但話時話，重鋼去年蝕14.7億元，重組消息曝光前，大行估計今明兩年依然要見紅，若非有篤手指的安排，試問何德何能可以啃得落，尤其收購資產要孭埋107.3億元債務。

或者收購令重鋼業績有即時幫助，但純粹從貪平角度，馬鋼（00323）同鞍鋼股份（00347）等資產折讓閒閒地有五成，重鋼收購折讓一成許唔算吸引，賭鋼鐵股死貓彈，肯定唔會揀佢。

古勝