絲絲講場：陸東飛鵝山起Dream House
飛鵝山屬於西貢豪宅區，住得呢處非富則貴，呢區住客最為人熟悉嘅係大美人林青霞同埋夫婿邢李(火原)。睇市好準嘅瑞銀外部顧問陸東，都係住呢區，絲絲尋日見到屋宇署最新資料，飛鵝山道18號飛鵝山莊其中1幢洋房，獲准建1幢兩層高嘅洋房，另設1條有蓋行人路及簷篷，總樓面約4,697方呎，申請人為Beautisun Development Limited，公司董事一欄，就係陸東。
有散戶股神稱號嘅陸東，絲絲素知佢投資眼光獨到，除咗股市之外，樓市亦有相當嘅心得，好似呢間自用嘅飛鵝山莊洋房，位處飛鵝山道，乃豪宅地段，成條飛鵝山道都係以獨立屋為主，單位數量少，密度超低，私隱度好到加零一，而陸東自住嘅飛鵝山莊仲相當獨特添，係一個有屋苑形式嘅集體保安管理嘅獨立洋房群體，亦係飛鵝山最貴重嘅屋苑。
07年6400萬筍價入市
絲絲記得佢喺○七年九月，向國泰（00293）買入呢個單位，當時作價只係6,400萬元，平均呎價約萬四蚊。事隔差唔多五年，呢幢洋房睇怕已經升值唔少，皆因飛鵝山莊洋房全數只有十二幢洋房大宅，一向放盤少得可憐，呢類獨立洋房根本就唔憂賣。
絲絲尋日搵陸東，想問吓間Dream house諗住點起，但搵唔到佢。最近佢喺訪問中提到做研究要好熟市場，佢話：「我住飛鵝山每日坐車去土瓜灣做好多研究……」，咁即係話，佢依家都住喺飛鵝山，佢向屋宇署申請重建兩層高洋房，究竟第日係自住，定部署善價而沽呢？絲絲真係好想親口問佢。