Market Insight：中建材反彈力強

唔少股民把基金經理奉若神明，查實多年來經驗話畀我哋聽，超過半數基金長期都跑輸大市，遠嘅唔講，供咗十年嗰份強積金，幾多有好下場，大家心中有數。高薪厚祿去管人哋嘅錢（OPM），贏可以博分花紅，輸，至多另謀高就，尤其近年如雨後春筍的對沖基金，說穿了，大部分根本不以對沖套戥搵食，只係美其名槓桿放大賭本的超級賭徒。

記得唔少芬佬年初錢多貨少，見LTRO有效，一至二月狂摸頂掃貨，到三、四月無以為繼，當五月第二波歐豬風暴來犯，已恨錯難返，五月未完唔少早已輸凸，近兩日，見high beta中資股被掃到甩轆，到底係十三年新高的沽空比之後的補倉？抑或係大孖沙睇住自己本簿唔掂檔，盡地一鋪博一博？睇嚟兩個因素同時存在。

放大圖片

放大圖片

速戰速決見好識收

以歷史估值，港股市盈率低於10倍，已進入「便宜」範圍，踏進六月，最緊要留意十五日穆迪對美國銀行前景觀察限期屆滿，多間美國銀行股有機會被降級，之後十七日希臘國會重選，可以預見，月中外圍消息極為關鍵。

近兩日的股市表現，反映唔少人賭歐美危機最終大步檻過，中國會放水救經濟。古勝唔係想潑冷水，股民最好明白家陣人人只係摸住石頭過河，記緊要見好識收。

年初古勝睇好內需食品股，理由是原材料價格回落，經歷近兩年毛利率壓縮期告一段落，儘管銷售放緩，食品股業績仍唔難有可觀增長。不過，十隻手指有長短，年初至今，統一（00220）升44.5%，旺旺（00151）升18%，康師傅（00322）跌23.7%（即使唔計昨日都跌18.7%），表現有雲泥之別。康師傅「獨弱」成因終於解開，撇除一次性收益，首季核心溢利按年跌16%，飲品業務沒有如預期般復甦外，原材料價格雖然回落，方便麵毛利率卻受低價產品比重上升影響，拖低整體毛利率，29倍預期市盈率仲要比統一25倍高，市佔率有流失趨勢，短期看來統一值博率明顯較高。

銅鐵股可多加留意

憧憬中央有限度放寬調控樓市政策，加上內地公布五十四個城市，五月累積售樓量創一一年初調控以來新高，內房股走勢凌厲，昨日介紹的恒大地產（03333）升9.2%，短短幾日低位反彈超過兩成。如果錯過機會，在其他醜股中尋寶，不妨留意歷史市帳率仲處於偏低水平的鋼鐵股，例如馬鋼（00323），而銅需求有機會因基建投資到位而回升，江西銅業（00358）走勢明顯轉強，值得留意。

最睇唔通可能是建材股，今年首五個月內地水泥價格一直級級落，像中國建材（03323），大行睇死產量及折舊上升，加上東部城市水泥價格仲未見底，未來兩季業績難以看好。然而，近期股價跌至8.4元行人止步，並無跟大市下試年初低位7.45元，唯一解釋是預期市盈率6.2倍，短期不利因素已反映。另外，睇番三月份累計沽空唔少（介乎9.5至10.8元），一旦空軍集體補倉的話，估計股價仲有1至2元水位可以炒吓。

內銀股差極有個譜

昨日話汽車股短線鑊氣增加，可以睇埋周邊股份，見正通汽車（01728）再升7%、中升（00881）同大昌行（01828）升4.9及3.7%。此外，昨日提到嘅內房板塊表現亦唔錯，相比之下，內銀板塊表現較失色，普遍僅升1至2%，最叻嗰隻係民行（01988），升5%。雖則話圍繞內銀嘅負面因素仍多，最近更有大行降低行業評級，但中央發出「穩增長」訊息，應有助改善投資者對中國市場嘅負面情緒，更何況若然中資股要來一次大反擊，少咗內銀股怎能成氣候？適逢多隻內銀股派息將於六月份除淨，睇睇能否博鋪財息兼收！

古勝