四叔李兆基係創辦人兼擔任信託理事會主席嘅培華基金，今年三十周年，特登喺北京人民大會堂大搞慶祝典禮，由於咁多年嚟，真係幫到國家喺改革開放後培養好多人才，所以受到各方面嘅肯定。
絲絲記得早年培華上京搞活動同領獎，分別嚟自四大家族嘅主要捐款人四叔、霍英東、彤叔鄭裕彤、同郭炳湘都會出席。而今次三十周年，訪京團四、五十人同樣浩浩蕩蕩，由四叔帶住兩位公子家傑、家誠，彤叔就單拖赴宴，郭炳湘可能忙於私人嘢而無出席到。
成個慶典嘅主要搞手仍然係培華常務委員會主席霍震寰、副主席兼項目負責人王敏剛，而培華原來已經幫到內地培訓人才18,000人次！四叔仲話只要幫到國家，會繼續出錢出力。
今年培華主力資助千名中西部大學校長海外研修，培華基金同四叔各捐4,000萬人民幣，五年內資助中西部大學書記校長等，到歐美頂級大學考察交流，香港幾間大學都會參與，所以多位校長教授都隨行，好似理大校長唐偉章、中大副校長徐揚生同港大教授程介明都有到場。
余絲韻