絲絲講場：數碼通翻兜2G搞新意
數碼通（00315）總裁黎大鈞一直都話自己唔會盲目跟科技潮流，就好似4G網絡咁，其他競爭對手已經相繼推出，但係佢哋都堅持唔出住，話要等有適合嘅4G手機出現先至會玩埋一份。
不過我諗大家都估唔到，數碼通唔推4G不特止，轉個頭竟然仲推番一樣配合2G電話嘅服務，實行「反潮流」咁話！
撳緊急掣似「平安鐘」
事緣佢哋近期就推出咗一項服務，用戶喺遇到緊急情況嘅時候撳一個掣，就可以接通應急團隊尋求協助。咦，咁似平安鐘嘅！公司仲話，如果你一個人喺公司OT到深夜，覺得有啲芝麻綠豆事要搵人幫手，都可以打去喎！
而呢個計劃仲配合Emporia呢個歐洲牌子嘅一部電話，呢個牌子嘅手機以簡單、啲掣同字體夠大，仲有震機夠勁等特性見稱，基本上係齋for你打出打入同send SMS，簡直可謂反璞歸真，但就好啱絲絲嘅爹地媽咪用。
不過絲絲諗，會唔會有用戶得閒得滯玩電話呢？999就話你玩電話可以告你，咁數碼通又可以點？
余絲韻